".... is in a relationship with kababayan niya"
Dalawang beses ko itong binasa at hindi nga nagkamali ang aking mga mata, talagang in a relationship na nga ang status niya.
Anong naramdaman ko? Syempre masakit pero nangibabaw ang gulat sa akin, gulat na hindi makapaniwala. Bumilis ang pintig ng dibdib ko na akala mo may mga tumatakbong elepante, daig ko pa ang kinakabahan. Sa sobrang gulat ko, tawa na lang ako ng tawa pero ganoon pala masaktan kahit hanggang pangarap mo na lamang siya - nakakatawa.
Subalit hindi pa ako nakuntento sa nalaman ko, dinalaw ko din ang Facebook ng kababayan niya at nakita ko sa wall nito na matagal na pala silang nagpapalitan ng personal na pagpapahiwatig ng halaga nila sa isa't isa (kung nauunawaan mo ako). Lalo akong nagulat sa nalaman ko.. siguro parang pinanguya ako ng bubog pero masaya pa rin ako. Ewan ko, ang gulo pero ganoon pala umasa, kahit hindi ka naman pinaasa, haha!
Ngayon ninanamnam ko pa ang mga bubog na nasa gitna ng bituka ko. Gayon pa man, kailangan ko ring lumakad na at umasang sana magiging masaya siya sa pinili niyang tao at desisyon. Wala naman akong magagawa kung ganoong klase ng tao ang gusto niya, ang tanging masasabi ko lamang sa gitna ng malinaw na salamin ay walang makapagdidikta sa kung sino ang para sa kanya, at ang pagiging masaya para sa kanya na lamang ang tangi mong maibibigay bilang isang kaibigan.
